Archangel Raphael/is

Tobías og Rafael erkiengill, Giovanni Gerolamo Savoldo (1542)

Rafael erkiengill með Tóbiasi, Pietro Perugino (um 1500)

„Rafael erkiengill“ er erkiengill fimmta geisla sannleika, heildstæði, lækninga, vísinda, framköllunar (efnisbirtingar), lífs í gnægðum, tónlista og stærðfræði. Guðleg samfella hans er kvenerkiengillinn María, sem endurfæddist í líki Maríu, móður Jesú. Geisli þeirra samsvarar orkustöð þriðja augans og þau geta einnig aðstoðað okkur við að öðlast andlega sýn og veitt okkur náðargjöfina að geta greint anda.

Gyðingahefð

Nafnið „Rafael“ merkir „Guð hefur læknað“ eða „lyf Guðs“. Í einum gyðinglegum texta er greint frá því að hann hafi opinberað fyrir Nóa lækningarmátt plantna; í öðrum er sagt frá því hvernig hann læknaði blindan mann og kom böndum á illan anda. Kaþólikkar heiðra hann sem engilinn sem læknaði sjúka við Betesda-laugina. Í Enoksbók er okkur greint frá að ábyrgð hans felist í því að lækna sjúkdóma og sár manna.

Samkvæmt gyðingahefð er hann nefndur sem einn hinna þriggja erkiengla sem birtust Abraham á Mamre-sléttunni. Reyndar er talið að það hafi verið Rafael sem gaf Söru, konu Abrahams, styrk til að verða þunguð þegar hún var komin yfir barneignaraldur.

Rafael er einnig þekktur sem verndari ferðalanga. Í Tóbítsbók fylgir Rafael, dulbúinn sem fróður ferðalangur, syni Tóbíts sem leiðsögumaður hans í langferð. Í lok sögunnar afhjúpar Rafael sanna sjálfsmynd sína og útskýrir að Guð sendi hann til að reyna trú Tóbíts og sonar hans. Þeir stóðust prófraunirnar og hlutu mikla lækningablessun og velfarnað.

Rafael og köllun Jesú

Þegar María fæddist á jörðinni, eftir að Guð hafði valið hana til að fæða Jesú Krist, avatara á öld fiskamerkisins, var Rafael erkiengill ekki með henni heldur yfirskyggði hana meðan hún gegndi köllun sinni og aðstoðaði hana við að færa heiminum „son hins hæsta“. Saint Germain endurholdgaðist sem Jósef eftir að Guð hafði valið hann til að vera eiginmaður Maríu. Á samsvarandi hátt endurholgaðist ekki tvíburalogi hans, hinn uppstigni kvenmeistari Porsja, heldur yfirskyggði hann.

Vísindi lækninga og heilunar

María og Rafael þjóna sjúkrahúsum heimsins og þau þjálfa verðandi mæður og feður á innri stigum í að kalla fram Krists-vitundina í gegnum fjóra lægri líkamana, sem eru starfstæki heilags Krists-sjálfs hvers og eins. Þau hvetja vísindamenn og þá sem eru þjálfaðir í heilunarlistum og læknisfræði til nýrra lækningaleiða og óhefðbundinna lækningaaðferða.

Englasveitir Rafaels eru afbragðsgóðir skurðlæknar. Rafael segir að þeir noti „leysigeislatækni“ til að „smjúga inn í kjarna frumunnar,... til að víkka út fjólubláa logann innan frá“ og „innsigla þá frumu í græðandi hugskotsmynd“.

Hin græðandi hugskotsmynd

Hin græðandi hugskotsmynd

Rafael erkiengill hefur birt græðandi hugskotsmynd sem er vísindalega hönnuð til að endurheimta innri formgerð og guðdómlega heild þegar maður sér fyrir sér að hún umlyki ​​og smjúgi inn í frumur og frumeindir hinna fjögurra lægri líkama eða tiltekið líffæri. Hún er samsett úr sammiðja hvelfum hins helga elds í hvítum, safírbláum og smaragðsgrænum logum. Hvíta hvolfið í miðjunni vinnur á innri stigum við að endurheimta skaddaða vefi eða sjúka líffærið til upprunalegrar fullkomnunar. Næst er bláa hvolið sem veitir vernd og virkir Guðs-viljann. Græna ytri hvolfið endurheimtir flæði andans í gegnum efnið og veitir heilbrigði.

Ef þú eða ástvinur þinn slasast skaltu kalla fram heilandi hugskotsmynd: „Í nafni Jesú Krists, ástkærs Rafaels erkiengils, hinnar blessuðu guðsmóður, skaltu setja hugskotsmyndina yfir viðkomandi einstakling [bættu við nafni hans].“ Ímyndaðu þér síðan hvolf hins helga elds stíga niður frá hjarta Guðs sem tifandi nærveru heilags anda. Ímyndaðu þér hinn hvíta eldkjarna í miðju glitrandi, safírblás loga umvafinn smaragðsgrænum eldi. Fyrstu mínúturnar og tímarnir eftir slys eru áríðandi. Hvort sem þú heldur bænavökuna við rúmstokk ástvinar eða úr fjarlægð, skaltu ímynda þér að skaddaðir líkamshlutar verði heilir og komist í upprunalegt heilbrigt ástand. Haltu þessari hugskotsmynd stöðugri í huga þínum. Kyrrðu hugann gegn öllum kvíða, efa og ótta og láttu ekkert hafa áhrif á þig. Einbeittu þér algerlega að því að halda græðandi sjónsköpunarmyndinni hugfastri og útilokaðu allt annað. Staðfestu að Guð í þér sjái allt í fullkomnu ljósi og enn á ný endurreist til sinnar sönnu myndar.

Hin óflekkaða ímynd

Erkienglarnir Rafael og María kenna einnig vísindi hinnar óflekkuðu ímyndar. Þessi vísindi stundar hver einasti engill á himnum. Þegar englar horfa á þig, sjá þeir þig í hreinleika þínum eins og þú varst þegar Guð skapaði þig í upphafi. Hann heldur þessari frumgerð yfir þér. Þetta gerir þér kleift að fylla inn í mynstrið og átta þig á hver þú ert í raun og veru — sonur eða dóttir Guðs.

Að halda ímyndinni um óflekkaða sýn merkir að þegar þú hugsar um einhvern, þá hugsarðu ekki um hann á gagnrýninn hátt. Ímyndaðu þér nærveru Krists í kringum hann og sjáðu hann í þeirri fullkomnun sem þú veist að Guð gaf honum í upphafi. Styðjið fólk með því að viðhalda þessari óflekkuðu, tæru og óaðfinnanlegu sýn. Haltu þessari sýn líka fyrir sjálfa/-n þig. Þegar þú hefur séð hvað þú ert í andanum og hverjir eru kostir sálar þinnar, verður þú að halda í þá mynd af veruleikanum í huga þínum og tilfinningum. Því er svo varið að ímyndin hrindir eðlislægt frá sér öllu sem stendur gegn birtingu veruleika þíns og hin fullkomna ímynd verður segulmagn sem laðar að sér skapandi kraft heilags anda að veru þinni til að uppfylla þá frumgerð sem þú heldur hugfastri.

María guðsmóðir segir:

Munið að ákalla Guð, Rafael erkiengil og mig og marga engla, til að lækna þar sem græðslu verður við komið. Og ef lögmálið leyfir ekki lækningu í holdinu, þá skaltu kalla fram ... lækningu sálarinnar og andans.... Það er lækning alls mannsins sem allt snýst um.

Karma og lækning

Raphael útskýrir lykilhlutverk karma í lækningu:

Karma, kæru vinir, er nokkuð sem fáir skilja. Og margir geta varla trúað vísindunum á bak við þetta fyrirbæri. Margir skilja varla hvernig karma geti gegnt svona mikilvægu hlutverki í því hvort sjúkdómur geti brugðist jákvætt við hinum bestu náttúrulegu lækningaaðferðum eða þeim sem hefðbundnu læknavísindin bjóða upp á.

Óvissuþátturinn x í jöfnunni um hvort einstaklingur muni læknast eða verða heilbrigður eða hverfa af skjá lífsins ræðst af þessum karma-aðstæðum. Þegar lögmálið kveður á um að karma verði að jafna og það strax gengur það ekki ef einstaklingurinn hefur ekki búið sér bókstaflega til ljóslind með uppsafnaðri tilbeiðsluorku og ljósmagni sem viðhaldið er í árunni, þegar hann er snauður af þeirri gleði sem þjónusta við Guð veitir. Þá gæti hann fundið að hann hafi ekki nægilegt ljós Guðs til að uppræta myrkrið sem skyndilega skýtur upp kollinum í efnislíkamanum....

Ástkærir vinir, er ekki eins gott að búa sig undir hina brýnu þörf með því að byggja upp ljósið í líkamsmusterinu og með því að jafna karma meðan þið eruð vinnufær? Þetta er hin sanna merking þess að „vinna meðan þið hafið ljósið“, eins og Jesús sagði lærisveinum sínum. Merkingin er: jafnið karma ykkar meðan þið hafið styrk ljóssins í veru ykkar til að inna af hendi þá þjónustu, þetta helgistarf og hið helga bænahald og staðfestingar sem geta umbreytt karmajöfnunni.

Við getum kallað fram fjólubláa logann til að umbreyta karma okkar jafnvel áður en það birtist sem sjúkdómur. Við getum læknast ef við beitum fjólubláa loganum á líkamleg og sálræn vandamál okkar. Ólíkt þessari aðferð við að takast á við undirliggjandi orsakir veikinda nota sumir iðkendur dáleiðslu eða hugrænar viljayfirlýsingar til að einfaldlega afneita tilvist sjúkdóms. Afleiðing þessara iðkana getur verið að vefræna sjúkdóminum verði þokað aftur inn í löngunarlíkamann (geðlíkamann), huglíkamann eða ljósvakalíkamann. Sjúklingurinn virðist vera læknaður, en karmað hefur verið bælt niður, til þess eins að koma aftur upp í þessu lífi eða í framtíðarlífi.

Rafael erkiengill útskýrir að það að nema á brott einkenni sjúkdóms án þess að fjarlægja ummerki orsaka hans í þessu eða fyrra lífi, geri sálinni mikið ógagn. Og sá einstaklingur sem fellur fyrir auðveldu „lækningunni“ mun einhvern tímann, einhvers staðar, í þessu eða framtíðarlífi, verða þess áskynja að sama vandamálið komi upp á yfirborðið sem þarf að takast á við sem karma til umbreytingar áður en vefræn sjúkdómseinkenni geta horfið varanlega.

Athvarf

► Aðalgrein: Athvarf Rafaels og Maríu guðsmóður

Athvarf Rafaels og Maríu guðsmóður er staðsett í ljósvakaríkinu uppi yfir Fátíma í Portúgal. Græðandi loginn sem logar á altari þeirra var jarðtengdur í efnisáttundinni þegar María birtist smalabörnunum þremur í Fátíma árið 1917. Þar er ljósstraumur sem streymir eins og öflugur foss úr ljósvakamusterinu til móttökustöðvarinnar (beinisins) á efnissviðinu og fram á þessa stundu hafa pílagrímar læknast af „vatni“ heilunarlogans.

Rafael og María guðsmóðir hafa boðið okkur að heimsækja athvarf sitt og leggja stund á vísindi lækninga:

Þið megið kalla á mig og Rafael, því ljósvakaathvarf okkar er uppi yfir Fátima í Portúgal. Þangað getið þið komið á næturna [þ.e. sálin í ljósvakaklæðnaði sínum, aðskilin frá efnislíkamanum í svefni] og lært lækningalistina. Ekki langt þaðan er Háskóli í anda Hilaríons uppi yfir Krít.

Kallið því á Guð og verndarengil ykkar og biðjið um að þið séuð tekin að nóttu í fíngerðari líkama ykkar þangað sem þið getið lært og rannsakað hvaða aðferðir má nota til lækninga og hvernig á gullöldinni, þegar jörðin er leyst undan ákveðnu karma og ákveðnum hópi fallinna engla í holdinu sem standa í vegi fyrir raunverulegum lækningum sem gætu verið í boði nú á tímum við krabbameini og öðrum banvænum sjúkdómum — [einnig lært] hvernig, í gegnum ykkur og aðra, hin sanna lækningalist geti loksins losnað úr viðjum og opinberast.

Lykiltónn Rafaels erkiengils er „Whispering Hope“ eftir Alice Hawthorne. Tónlistin við Messías blés Rafael Händel í brjóst.

Heimildir

Mark L. Prophet and Elizabeth Clare Prophet, The Masters and Their Retreats, sjá “Raphael.”