Royal Teton Retreat/is

Teton fjallgarðurinn

Royal Teton-athvarfið, sem samsvarar Teton-fjallgarðinum í námunda við Jackson Hole-dalinn í Wyoming-fylki í Bandaríkjunum, er höfuðathvarf Stóra hvíta bræðralagsins á meginlandi N-Ameríku. Uppstigni meistarinn Konfúsíus er höfuðsmaðurinn í þessu jarðneska ljósvakaathvarfi á Grand Teton-fjallgarðinum. Athvarfið er forn og mikil ljósmiðstöð þar sem hinir sjö geislar elóhímanna og erkienglanna eru virkjaðir.

Karma-drottnarnir, Gátama Búddha og allir liðsmenn Stóra hvíta bræðralagsins fjölmenna á þennan samkomustað uppstignu meistaranna og lærisveina þeirra, jafnframt því sem þeir halda úti sérhæfðri starfsemi í eigin athvörfum.

Saga

Þetta er mjög fornt athvarf. Það var á þessum stað sem fyrsti og annar rótarkynstofn stigu niður á efnissviðið með stuðningi Mikaels erkiengls og hina erkienglanna. Þegar fyrsti rótarkynstofninn lauk erindi sínu og steig upp til himna tók hann sér stöðu innan helgivaldsins til að styrkja sig í sessi.

Athvörf og ljósamiðstöðvar hins Stóra hvíta bræðralags voru smám saman komið á fót þegar aðilar fyrsta rótarkynstofnsins risu upp til að fylla þær stöður sem nauðsynlegar eru fyrir sífellt hækkandi og yfirstígandi segulvæðingu ljóss á plánetunni. Í árdaga fyrsta rótarkynþáttarins var Royal Teton-athvarfið opnað sem heimili manúsins og ljósabeinir hinna sjö ástsælu erkiengla og uppfyllingu þeirra (þ.e. maka) sem höfðu einnig jarðtengt loga sína yfir þveran og endilangan hnöttinn.

Samfundir í athvarfinu

Tvisvar á ári – við vetrar- og sumarsólhvörf – koma þeir saman í ráðsal þessa athvarfs til að bregðast við bænarskrám og beiðnum sona og dætra Guðs, og til að veita blessun Alfa og Ómega sem streymir úr hjarta þeirra í Meginsólinni miklu – orkustraumum til uppljómunar og framfara mannkyninu.

Á hverju gamlárskvöldi færir Þögla vitnið Heimsdrottninum, Gátama Búddha, hugmyndasmíði ársins fyrir sólkerfið sem áframsendir það til hinnar óuppstignu jarðarþróunar frá Royal Teton-athvarfinu. Hugmyndasmíðin inniheldur úrlausnir sem birta vilja Guðs fyrir jarðlífið fyrir komandi tólf mánaða tímabil.

Grand Teton

Lýsing

Við nálgumst langan inngang Royal Teton-athvarfsins í samfylgd uppstigins meistara. Stór klöpp úr fjallshlíðinni lýkst upp fyrir honum og miklar bronsdyr opnast upp á gátt. Við tökum lyftu um sjö hundruð metra niður að hjarta fjallsins. Þegar við komum inn í móttökusalinn blasir við stórfenglegur myndvefnaður, skreyttur silki og gersemum. Þar sjást stofnendur athvarfsins leysa úr læðingi gífurlega sólarorku.

Í fylgd með uppstigna meistaranum Saint Germain heimsótti Guy W. Ballard (sem nú er uppstigni meistarinn Godfré) Royal Teton-athvarfið á öldinni sem leið. Hann skráði reynslu sína í Táknahellinum og birti þær frásagnir í bókunum Afhjúpun launhelganna og Töfra-nærveran.

Stóri ráðstefnusalurinn

Þarna er stór ráðstefnusalur, sjötíu metra langur og þrjátíu metra breiður, og eru sautján metrar til lofts. Hluti veggjanna er gerður úr ónix-steinum, að öðru leyti er salurinn úr fínpússuðu bláu og rósrauðu graníti. Ósnortin gullæð í einum vegg magnar enn áhrifamátt salarins.

Í miðju bogadregnu loftinu er gullskífa, fjórir metrar í þvermál. Sjöhyrnd stjarna, öll úr skínandi gulum gimsteinum, fyllir út í miðju skífunnar og geislar frá sér gylltu ljósi. Í kringum þennan brennidepil Meginsólarinnar eru tveir tólf þumlunga sverir hringir – innri hringurinn er rósbleikur og sá ytri er djúpfjólublár í öllum regnbogans blæbrigðum. Sjö minni skífur umlykja einnig Meginsólina og safna sjö útgeislum elóhímanna í brennidepil. Þessir geislar lífga við og endurnæra orkustöðvarnar sjö í manninum ásamt taugahnoðkjörnum í dýralífinu. Straumarnir sem elóhímarnir beina í gegnum þessa brennipunkta gagnast einnig ríki höfuðskepnanna fjögurra og jurtaríkinu á jörðu.

Á fjarlægari enda veggjarins er stórt auga sem táknar alsjáandi auga Guðs. Í gegnum það fara voldugir straumar. Þeir stilla saman kraftana sem leika um jörðina í samræmi við flekklausa ímynd sem Guð viðheldur fyrir alla sköpun sína. Sjö geislar elóhímanna eru virkjaðir í þessu athvarfi og geislarnir eru samþjappaðir og jarðtengdir í þessari miklu mynd af alsjáandi auga Guðs í stóra ráðstefnusalnum.

Kosmíski spegillinn

► Aðalgrein: Kosmískur spegill

Á öðrum vegg er skjár úr framkölluðu og samþjöppuðu ljósvakaefni og er hann notaður til leiðsagnar vígðum lærisveinum uppstignu meistaranna og liðsmönnum bræðralagsins. Hérna varpa meistararnir á skjáinn akasha-ljósvakaskrám af viðburðum á jörðinni frá örófi alda eða frá öðrum hnetti sem þeir vilja veita fræðslu um – úr fortíð, nútíð og framtíð.

Aðrar vistarverur

Í þessu athvarfi eru einnig skjalaherbergi sem hafa að geyma gullletraðar snældur með upptökum frá hinum mörgu siðmenningarskeiðum á jörðu frá upphafi vega. Í öðrum sölum eru gull og gimsteinar sem uppstignu meistararnir hafa bjargað frá týndum meginlöndum og föllnum siðmenningarríkjum.

Í miðri gullhirslunni er brennipunktur þar sem sólarljósi er þjappað saman. Í öðru rúmi er brennipunktur fyrir þrígreinda logann. Þarna er einnig að finna stofu fjólubláa logans og ennfremur vísindadeildir og endurhæfingarstöðvar og ráðstefnusalir þar sem settar eru fram ráðagerðir og þróunarverkefni sem endurholdguðum sálum er ætlað að hrinda í framkvæmd.

Margar kennslustofur eru ætlaðar nemum sem þangað koma í svefni íklæddir fíngerðari líkama sínum. Séð er fyrir öðrum svæðum handa þeim sem hafa yfirgefið líkamann eftir andlátið og er haldið sofandi þar til tími er kominn til að endurvekja þá til undirbúnings næstu endurfæðingu. Í tónlistarsal er að finna unaðsleg hljóðfæri sem uppstignu meistararnir hafa fullkomnað. Þaðan er hljómkviða himnanna flutt út í heiminn. Hið fullkomna hljóðmynstur sem sum þessara hljóðfæra gefa frá sér eru látin birtast í hugarheimi einstakra tónlistarmanna á jörðu. Vænta má fleiri slíkra himnasendinga á nýrri gullöld. Margar uppfinningar, vísindalegar uppgötvanir, listræn tækni og aðrar nýjungar á öllum sviðum mannlegs lífs – sem uppstignu meistararnir hafa þegar þróað – verða einnig gefnar út frá þessu athvarfi þegar mannkynið hefur gert sér far um að nota þær á heiðvirðan og sæmandi hátt í samræmi við gullnu regluna.

Royal Teton-athvarfið er beinir fyrir framköllun menningar hinnar guðlegu móður. Útfellingin er forsenda fyrir tilurð gullaldarinnar, og er sá logi jarðtengdur hér – grænn kínverskur litur með gullnum og gulum blæ. ...

Þátttaka í athvarfi

Samkomur eru haldnar í Royal Teton-athvarfinu og sækja þær þúsundir lífstrauma frá öllum meginlöndum, sem fara sálförum í fíngerðari líkama sínum í svefni. Einnig eru haldin minni háttar námskeið og gefnir einkatímar.

Auk uppstigna meistarans Konfúsíusar reka Saint Germain og drottinn Lantó hér Háskóla andans – námskeið halda drottnar geislanna sjö og Maha Chohan í athvörfum sínum fyrir tugþúsundir nema sem leitast við að ná færni og leikni á þessum sjö geislasviðum. Stórt hringleikahús hefur verið reist á ljósvakasviðinu yfir þessu athvarfi fyrir þessa lífsstrauma sem hefur með nýlegri ívilnun verið heimilað að sækja athvörfin í fíngerðari líkama sínum til að þiggja leiðsögn.

Konfúsíus hefur gefið nánari skýringu á til-gangi þess að leita til athvarfsins:

Það eru ýmsar ástæður fyrir því að sækja heim Royal Teton-athvarfið, ekki síst vegna þess að margir sem uxu úr grasi í Kína til forna hafa endurfæðst í Ameríku. Þar má greina þessar hljóðlátu búddhísku sálir, þessa iðnu vinnumenn, sem hafa lagt grunninn að fjölskyldugildum álfunnar, að fjölskyldutryggð, að siðareglum, að mildi og ljúfmennsku og að námslöngun sem leið til guðsvitundar.

Margir þessara manna hafa orðið handgengnir kenningum frá Tíbet og kenningum Siddhartha Gátama og Maitreya. Þeir koma úr austri, og hafa endurfæðst svo að frelsisloginn geti tendrað visku þeirra, svo að þeir geti hlaupið undir bagga með fólki í álfunni á þessum miklu umbrotatímum við þúsaldaskilin, til þess að snúast gegn vélvæðingu falskrar efnishyggju sem víki fyrir himnesku ástandi og andríki, til þess að mannkynið geti sigrast á sjálfinu, á samfélagsmeinunum og á takmörkum tíma og rúms.

Lantó býður okkur einnig að sækja fyrirlestrana í þessu athvarfi:

Hér í sölum Royal Tetons, þar sem gullinn sigurblær mettar andrúmsloftið sem hinir sigursælu hafa helgað, stend ég til að lesa fyrir þá sem bera kyndil Heimsmóðurinnar og fyrir þá afkomendur hennar sem hafa snúið baki við jarðneskum lifnaðarháttum heimsins og tekið við möttli hennar. Ég býð alla velkomna sem leita viskunnar – þó að hún bregði yfir sig ýmsum hulum þegar hún gengur í gegnum ólík lærdómsstig – öllum sem leita þekkingar hennar sem sannrar þekkingar sem streymir frá frjóum huga skaparans.

Við ykkur segi ég: Komið að Viskubrunninum og verið reiðubúin, á meðan enn gefst tími til, að verða allt það sem Viskan hefur ætlað ykkur öldum saman. Og með hinni heilögu sedrusviðarolíu smyr móðirin ykkur og helgar og vígir til samruna við logann.

Tónlistin sem stillir okkur inn á bylgjulengd þessa athvarfs er söngur úr óperunni Tannhäuser, „Til kvöldstjörnunnar.“

Sjá einnig

Alfas, dyravörður í Royal Teton-athvarfinu

Heimildir

Mark L. Prophet and Elizabeth Clare Prophet, The Masters and Their Retreats, sjá “Royal Teton Retreat.”